Schloagt na die Zeidung uff: Fasnoacht, Fasnoacht, Fasnoacht! Es vergäiht koan Doag, an dem wu die Fassebutze net die Seite voll mache deede. Die Barbara un die Saimarkt-Sänger laafe sogar unsre Bolidigger de Rang ab. E-mool ehrlich: Woas sinen schun de Landrat orrer de Boijemoaschder gäije die Fraa Zugmarschall orrer gäije die Kerschhaiser Schirmherrn? Kumm, vergesses.

Wie ich in de letschd Woch uff de Hoambescher Habafa war, häwwe de Wilkes un de Herbert vorneweg zäije Meter Luftlinie aus-enanner gehoggt kadde un druff uffgebasst, dasse sich net in die Aage gugge misse. „Da kommt aber Freude auf“, hot de Schlaumeiers-Franz glei soin Senft dezu-gäwwe misse. Un doann horrer noch woas gsoad, de Franz: „Die beiden erinnern mich an die Feuerwehr von früher: Hau ab, das ist mein Feuer.“ Ich waaß bis jetzt noch net, woas dodemit gemoant war. Jetzt froog ich Eich, ehr liewe Lait: Woas hodden de „Halwe Mond“ mit de Feierwehr zu du? Naja, de Franz war schun immer en Dummschwätzer.

Tusch uff unser scheeni, goldischi Hepprumer Fasnoacht. Momendoan spitzt sich alles uff de Gaudiworm zu, wu moije in zwaa Woche is: „Im ersten Jahr führt Barbara, mit de Saimarktsänger die Narrenschar.“ Goethe is nix degäije. „Sitzt, basst, waggelt un hot Luft“, hot sich die Zeidung gsoad un zum Adiggl sogar noch e Bild mache losse. Oans waaß ich schun jetzt: Woanns ECHO noch weirer mit Fasnoachts-Adiggl bombardiert wärd, dann woachse de Redakdörn vun goanz eloa Babbnoase. Wie ich geschdern moijend die Redakzjon ou-gerufe häb, häwwe-se sich sogar mit „Helau“ gemeld. Des war äwwer na aus Versäije. Die Sekretärin wollt eigentlich soage: „Hallo, Hit Radio FFH.“

Häbt ehrs mit-grieht, liewe Lait: Am Dienschdoag hot e jungi Hepprumern sage un schreiwe zäije-dausend Euro gewunne. Fä zäije-dausend Euro muss e oaldi Fraa loang stricke. Die Petra Werle (Gliggwunsch) hot sich richdisch gemeld kadde un war faschd ausem Haisel. „Hurra“, hot’se ins Telefon gegresche un heed am liebschde die goanz Welt umarmt. Ich häb, ehrlich gsoad, mitfiehle kenne. Noch ehrlicher gsoad, heed ich mich veel mäiner driwwer gfraad, woann die Lait vum Funkhaus mich ou-gerufe heen. Nix war’s. Hunsel! Die Hoffnung stirbt zuletschd.

Ich häb mer uff moi Telefon-Dischel sogar extra en Zeddl geläigt un meld mich seit vier Woche na noch mit „Hallo, Hit Radio FFH“. Un wer war bis jetzt am Abbarad?: 1. Die Komiker vum Finanzamt, wu Geld hou wolle. 2. En Versicherungs-Hoini, wu mich schun seit ewisch un drei Doag nervt. 3. De Dörsams-Adi, wu mer en scheene Gruß vun moim Moann ausgericht hot, ich sollen mim Audo abholle. Die Sach is nehmlich die: Woann moin Herr Gemahl Vorstandssitzung hot, dauert’s als e-bisselsche länger. Die Herrn rechne in annere Zeiteinheite. Motto: Fä jeden Tagesordnungspunkt oan Schobbe. Mindeschdens. Des zieht sich, ehr Lait, ou zieht sich des.

Wu war ich vorhin stäih-geblewwe? – ach sou, bei de Fasnoacht. Ich häb mer verzäihle losse, dass manche Bütteredner manche-mool arig dick ufftroage deen. Leirer schoint’s immer mäiner in Mode zu kumme, in die unnerschd Schubload zu greife. Reißt Eich am Rieme, Jungs. Es gibt Grenze. Un denkt drou, dass richdisch gudi Fasnoacht veel mäiner is als wie blouß dräggische Witz zu reiße. En Fassebutz ist doch koan Puff-Lui – orrer doch? Wu sollen des noch hie-fiehrn? En Tipp an die Präsidente, also an die Sort vun Narrn, wu mim Smoking rumrenne und vor laurer Orden uff de Bruschd beim Laafe en Buggl mache misse: Na em Metzger konn die Zukunft worschd soi. Alles paletti?

Eich allminanner e scheenes Wocheenn. Un denkt drou, Eich richdisch am Telefon zu melde: „Hallo, Hit Radio FFH.“

Bis die negschd Woch

Eijer Bawett